Өзбекстандан велосипед менен ажылык зыяратка аттанган пенсионерди түркмөн чек арачылары үйүнө кайтарды

Наманган облусундагы Чартак районунун 75 жаштагы жашоочусу Хусан Хожибаев велосипед менен Сауд Арабиясына 2-июнда сапар тарткан. Түркмөнстандын чек арачылары пенсионерди ажылык сапардан артка кайтарганы белгилүү болду.

Пенсионер Өзбекстан-Түркмөнстан чек арасындагы "Фарап" көзөмөл өткөрүү пунктуна келгенде визасы жок болгондуктан чек ара кызматкерлери өткөргөн эмес. Ал Намангандан Түркмөн чек арасына 7 күндүн ичинде 1150 чакырымды басып келген. "Мени чек арадан өткөрүшкөн жок. Чек ара кызматкерлери менин бул демилгемди сыйлагандыгы үчүн деле өткөрүп коё беришерин, бирок өлкөнүн ичинен тийиштүү кызматтар кармап алып кайра депортация кылып коюшарын айтышты. Ошондуктан убара болбоюн деп артка тарттым", - деген Хожибаев. Ал өлкөсүнө кайрадан эле велосипеди менен келет.

Хусан Хожибаев 2016-жылдын сентябрь айында маркум президент Ислам Каримовдун мүрзөcүнө куран окуш үчүн 500 чакырым жол жүрүп Самаркандга барганы менен да белгилүү. Аксакалдын сапарын интернет колдонуучулары “кичи ажылык” менен салыштырып, ага жаңы велосипед белекке беришкен.