Караколдо спорт мектебинин машыктыруучусун сабагандардын бири мурдагы Каракол шаардык кеңешинин депутаты экени аныкталды

Караколдо спорт мектебинин машыктыруучусун сабагандардын бири мурда Каракол шаардык кеңешинде "Улуу Кыргызстан" фракциясынан депутат болгон Максат Касенов экени аныкталды. Бул тууралуу SUPER.KG`ге Ысык-Көл ОИИБинин басма сөз катчысы Сталбек Усубакунов билдирди.

"Окуядан кийин дароо эле шектелип, 2 адам кармалган, алардын бири Максат Касенов болчу. Аларга 48 сааттан кийин 9-июнда Каракол шаардык сотунун чечими чыгып 2 айга камалды. Учурда тергөө иштери жүрүп жатат", - дейт Сталбек Усубакунов.

Ал эми жабырлануучу Акысбек Өмүрбековдун абалы учурда турукташып калганын дарыгери кабарлады.

"Жакшы болуп калды, жандандыруу бөлүмүнөн которулган. Учурда абалы туруктуу", - дейт Ысык-Көл облустук бириктирилген ооруканасынын травматология бөлүмүнүн башчысы Рысбек Жусупов.

Эскерте кетсек, 7-июнда Каракол шаарындагы "Алга" спорт мектебинин машыктыруучусу Акысбек Өмүрбеков катуу сабалып оорукананын жандандыруу бөлүмүнө жаткырылган.