Ошто сүттү кайра иштетүүчү завод ачылып, 40 жаран жумуш менен камсыз болду

Ош шаарында сүттү кайра иштетүүчү завод ачылып, 40 жаран жумуш менен камсыздалды. Өкмөттүк аппараттан кабарлашкандай, кечээ, 11-июнда өкмөт башчы Сооронбай Жээнбеков Ош облусуна жасаган иш сапарынын алкагында заводдун ачылышына катышты. Жээнбеков мындай заводдордун ачылышы ички миграциянын азайышына өбөлгө түзөрүн айтты.

"Завод күнү-түнү жергиликтүү элден сүт алып, аны кайра иштетип, сыр, май, кургак сүт жана башка сүт азыктарды чыгарат. Анын курулушу Евразия экономикалык биримдигинин талаптарына толук жооп берип, чыккан продукцияларды Орусия, Казакстанга экспорттоо пландалууда", - деп айтылат маалыматта.

Анда белгиленгендей, өкмөт башчы жергиликтүү бийлик жана тиешелүү мамлекеттик органдарды ишканага максималдуу түрдө колдоо көрсөтүүгө чакырды. Ошондой эле ал айыл чарба тармагын өнүктүрүүгө республикалык бюджеттен жана эл аралык донорлордон ири суммадагы каражат сарпталып жатканын эскертти.