Милиция тарабынан куугунтукка алынган унаанын терезесинен баңгизат ыргытылды

Чүй облусунда 25 жаштагы тургун 26 килограмм салмактагы баңгизаты менен кармалды. Бул тууралуу бүгүн, 12-июнда Ички иштер министрлиги маалымдады.

Берилген маалыматка ылайык, 10-июнь күнү Жайыл райондук баңгизатын мыйзамсыз айландырууга каршы кызматы шектүү делген Мазда үлгүсүндөгү унаанын артынан түшкөн. Айдоочу милициянын токтоткондугуна баш бербей айдап, унаанын арткы терезесинен баңгизаты бар баштыктар ыргытылган.

"Милиция кызматкерлери шектүү делген унааны Панфилов районунан кууп жетип, аны башкарып бара жаткан Чүй облусунун 1992-жылы туулган А.Х. аттуу тургуну экенин аныкташкан. Анын жанынан 26 килограмм баңгизаты табылып, текшерүүдөн кийин табылган зат кургатылган марихуана экени билинди. Учурда кылмышка тиешеси бар делген, унаадан түшүп качып кеткен дагы 2 жаран изделүүдө. Бул боюнча козголгон кылмыш ишинин алкагында иликтөө иштери жүрүп жатат", - деп жазылат ИИМдин маалыматында.