Акыйкатчы Кубат Оторбаев: "Өлкөдөгү тигүү цехтердин абалы начар, андагы жумушчулар укуктарын билишпейт"

Өлкөдөгү тигүү цехтердин абалы начар. Мындай пикирин бүгүн, 12-июнда Жогорку Кеңештин Социалдык маселелер, билим берүү, илим, маданият жана саламаттыкты сактоо боюнча комитетинин жыйынында Акыйкатчы Кубат Оторбаев билдирди.

"Тигүү цехтеринде иштеген жарандардын эмгек укуктары жөнүндөгү маалыматтары аз. Алардын айлыгынан социалдык фондго деп акча кармап калып, бирок которулбаганы аныкталган. Ошондой эле кышкысын айрым цехтер кооптуу жылыткычтар менен отурушат. Жыгач полдор жок, бетон боюнча турган жайлар да бар. Айрым цехтерде айнек терезе, эшиктер жок экен", - дейт ал.

Мындан тышкары Оторбаев кара жумушка тартылган балдардын саны көп болуп жатканын айтты. 2014-жылы 142 миң 760 баланын кара жумушка тартылганы белгилүү болгон. Бул 2007-жылга салыштырмалуу кара жумушка тартылган балдардын саны 93 миңге көбөйгөнүн билдирет. Бул боюнча маселени чечүү үчүн министрлик, мекемелер менен чогуу иштөө керек экенин белгиледи.

Жыйында "Аялдардын жана балдардын эмгек укугун сактоо: мониторингдин натыйжасы" тууралуу акыйкатчынын маалыматы угулду.