Үч майрамды бир күндө белгилеген ырчы Анжеликанын туулган күнүнөн фоторепортаж

12-июнда популярдуу ырчы Анжелика Бекболиева 28 жашка толду. Бул күнү ырчы өздүк майрамын эле эмес, чыгармачылыкта жүргөнүнө 20 жыл, жолдошу Урмат Бекболиев менен баш кошконуна 10 жыл толгонун Бишкектеги ресторандардын биринде шаңдуу белгиледи. Майрамдык кечеге түгөйлөрдүн жакын туугандары, достору, ырчынын сахналаш кесиптештери жана кыргыз шоу дүйнөсүндөгү белгилүү ырчылар: Гүлнур Сатылганова, Бактыгүл Бадыева, Съездбек Искеналиев, Нэна, Урмат Усенов, Неля жана башкалар күбө болушту.
Кече шаңдуу бий, ырлар менен коштолуп жатты. 3 майрамды бир күндө белгилеген Анжеликаны бул күнү жакындары гүлгө ороп, ага үй-бүлөлүк бакыт, чыгармачылык ийгилик каалап, бир ооздон "эми уул төрө" деген каалоо-тилектерин айтып жатышты.

Ошондой эле кечеде ырчынын кайненеси "келинимдин келгенине 10 жыл болуптур. Ошондогу салган сөйкөмдү жаңыртайын. Эмдиги жылы уулдуу болгондогу жакшылыгыңа келейин" деп батасын берип, ырчынын кулагына жаңы алтын сөйкө салды.

Кече соңунда конокторго арналган өзгөчө кооздолгон торт ооз тийүүгө таратылды. Анда түгөйлөр кантип таанышканы, 10 жылда өткөргөн бактылуу күндөрүнүн урунттуу учурлары чагылдырылган.

Майрамдык кече кандай өткөнүн толугу менен жакында Супер ТВ бөлүмү даярдаган видеорепортаждан көрө аласыздар.