Орусиядагы коррупцияга каршы акция жалпы 187 шаарда өтүп, Москвада миңдеген киши кармалды

12-июнда Орусиянын күнүндө Москва шаарында жана өлкөнүн башка шаарларында коррупцияга каршы акция өтүп, массалык камоолор менен коштолду. Бул күнү Орусиянын бардык бурчунда Орусия күнүн белгилөө үчүн майрамдык иш-чараларды уюштуруу пландалган. Акциянын уюштуруучусу Коррупция менен күрөшүү фондунун негиздөөчүсү Алексей Навальный 12-июнь күнү саат 13:30 чамасында кармалып, кечки саат 19:00 чамасында Симонов райондук сотуна алынып келинди. Анын аялы социалдык тармакка "ОМОНчулар үйдүн подъездинен кармап кетишти" деп жазды.

Акциянын жүрүшү Казань шаарында таңкы саат 07:00дө башталган. Ал жакта Коррупция менен күрөшүү фондунун өкүлү 400 демонстрант чогулганын белгиледи. Ушундай эле митингдер Орусиянын көптөгөн шаарларында өткөрүлүп, плакат көтөргөндөрдү жана акцияларды жер-жерлерде уюштурган жетекчилерди камоо, айып салуу орун алды. Жергиликтүү бийликтер демонстранттарды мыйзамсыз акция уюштурушту, уруксат берилбеген аймактарга чогулушуп, баш аламандык жаратышты деген айып менен жарандарды кармап кетип жатышты.

Орусиянын Ички иштер министрлигинин Башкы башкармалыгы Навальный уюштура турган коррупцияга каршы акцияны күн мурунтан талкуулашып, Сахаров кең көчөсүндө гана өткөрүүгө уруксат берген. Бирок Навальный буга макул болбостон, Тверь көчөсүндө өтөт деп 11-июнь күнү кечинде жарыялаган. Массалык камоолор, окуянын очогу Москванын дал ушул Тверь көчөсүндө орун алды.

Ушундай эле массалык кармоолор жана акциялар Санкт-Петербургда да орун алды. Саат 17:45ке карата Санкт-Петербург шаарында 900гө жакын адам кармалса, Москва шаарында бул убакытка карата 700 адам полиция пункттарына алып барылган. Ал эми түнкү саат 23:00гө карата Москва шаарында эле миңдей киши кармалган.

ИИМ билдиргендей аталган акция Орусиянын 187 шаарында өттү.