Майлуу-Сууда дарыядан адамдын буту табылып, ал кимдики экендиги белгилүү болду

Майлуу-Суу шаарындагы Майлуу-Суу дарыясынан адамдын бутунун тизеден ылдыйкы бөлүгү табылды. Жалал-Абад ОИИБинин басма сөз катчысы Мыктыбек Турдубаевдин 13-июнда SUPER.KG'ге билдиришинче, бут сөөк кимдики экендиги аныкталды.

"7-июнь күнү Майлуу-Суу шаардык ички иштер бөлүмүнө бул боюнча маалымат түшүп, милиция кызматкерлери сөөктү суудан алып чыгышкан. Дароо эле шаардагы биргелешкен ооруканага алып барышып, ал жерде сырттан кароо жүргүзүлүп, бут сөөк 1962-жылы туулган шаар тургунуна таандык экендиги жана буттун ээси тирүү экендиги аныкталды.

Белгилүү болгондой, шаар тургуну 2016-жылдын ноябрь айында буту ириңдеп кетип шаардык ооруканага барып кестирип салган экен. Кесилген бут бөлүгүн талаага алып барып күйөө баласына көмдүрүп койгон. Иликтөө иши жүрүп, сөөк көмүлгөн жерди казганда, табылган жок. Мүмкүн иттер чукуп чыгып, андан ары сууга сүйрөп барышкандыр. Ошого карабастан биз облустук тийиштүү экспертизага жиберип, шаардагы буту кесилгендерди текшерүүгө алып чыктык. Себеби сөөк ошол бутун ампутация кылдырган адамга таандыкпы, жокпу баары бир экспертиза жүргүзүлүшү керек", - деди Турдубаев.

Басма сөз катчы бул окуяда кылмыштын изи табылбагандыгын кошумчалады.