Индия-Кыргыз беттеши соңуна чыкты. Оюнда Индия курамасы өз үйүндө 1:0 эсеби менен жеңишке жетти

2019-жылкы Азия Кубогунун финалдык баскычына чыгуу үчүн Кыргыз футболчулары кезектеги беттешин өткөрөт. Анда Индиянын Бенгалор шаарынын стадионунда Индия-Кыргыз беттеши орун алат. Аталган оюн “А” тайпасында 2-турдук оюн. Алгачкы турдук оюнда Индия Мьянманы жеңсе, Кыргыз Макаону өз үйүндө 1:0 менен жеңип алган. Учурда эки курама команда 3 упайдан ээлик кылышат.

Оюн алдындагы маалымат жыйында “Ак шумкардын” башкы машыктыруучусу Александр Крестинин Кыргыз футболчулары жеңиш үчүн келгендигин айтып өттү. “Индия өз үйүндө олуттуу команда. Бирок биз 3 упай алуу үчүн ойнойбуз. Даярдыгыбыз жакшы, команда мыкты оюн өткөрөт деп ишенем”.

Кыргыз курамында бир канча кооптуу жагдайлар бар. Алган жаракаттарынан улам Ислам Шамшиев, капитан Азамат Байматов, коргоочу Валерий Кичин бул оюнга чыга алышпайт. Бүгүнкү оюнда капитандыкты Мирлан Мурзаев колго алат.

20:21 "А" тайпасындагы биринчи оюн соңуна чыкты. Анда Мьянма конокто Макаону 4:0 эсебинде жеңип, 3 упайга ээ болду.

Кыргыз курама командасынан талаага чыкчу негизги курам:

Дарбазада: Павел Матяш.

Коргоочулар: Аманбек Маныбеков, Ильяз Алимов, Тамирлан Козубаев, Виктор Майер

Жарым коргоочулар: Фархат Мусабеков, Ахлидин Исраилов, Мирлан Мурзаев, Антон Землянухин, Бахтияр Дүйшөбеков.

Чабуулчу: Виталий Люкс.

20:32 Көптөр күткөн беттеш башталды. Япониялык калыстын ышкырыгы оюнга старт берди.

20:36 Алгачкы мүнөттөрдө эле Антон Землянухин талаада жаракат алды. Анын жаракатын дарыгерлер карап жатат. Антон Землянухин жаракатынан улам оюнду уланта албай калды.

20:42 Антон Землянухиндин ордуна талаага Эдгар Бернхардт чыкты. Алгачкы 10 мүнөттө Кыргыз футболчулары чабуулда. Алыстан Люкс сокку узатты. Алгачкы бурчтан чыгаруу да "Ак шумкар" тараптан болду.

20:44 Кыргыз футболчулары дээрлик атаандаштарын топсуз калтырууда. Индия футболчулары коргонууга аргасыз болууда. Валерий Кичинди алмаштырган Аманбек Маныбеков сол канатта көзгө көрүнүүдө. Эскерте кетсек, Кичин машыгууда алган жаракатынан улам Индия футбол талаасына чыгуу мүмкүнчүлүгүнөн ажыраган.

20:45 Коргонууда ойногон "Абдыш-Атанын" футболчусу эки жолу индус футболчусун топсуз калтырды. Мурзаевдин соккусу индиялыктар үчүн кооптуу абал жаратты. Дарбазачысы гана сактап калды.

20:50 Бурчтан чыгарып берүү майнапсыз болду. Индия чабуулу офсайдга такалып калды. Эми гана эсине келе түшкөн үй ээлери чабуулдарды уюштуруп баштады.

20:56 Күрөш көпчүлүк учурда талаанын ортосунда жүрүүдө. Мындай өңүттө оюн жүрсө Дүйшөбеков, Бернхардт жана Мусабековдун оюнунан беттештин жыйынтыгы көз каранды. Индус футболчулары оң каптал менен чабуул уюштурду. Сокку дарбазанын үстүнөн өттү.

20:58 Оң каптал кооптуу болууда. Индия маал-маалы менен чабуулду ушул жактан кылууда. Индус чабуулчусунун кубаттуу соккусун Матяш тосуп алды.

21:03 Чабуулдагы Виталий Люкс мыкты мүмкүнчүлүктү колдоно албай калды. Мусабековдун катасынан кийин чабуулчулар эсепти ачууга белсеништи. Жетип келген Маныбеков акыркы учурда гана сактап калды.

21:07 Крестинин футболчуларына кеңеш берүүдөн тажабай, өз ордунда отурган жок. Кезектеги коноктордун чабуулу майнапсыз - Мусабековдун соккусу коргоочуга тийип калды. Үй ээлеринин чабуулчуларын Матяш тосуп алды.

21:14 Исраиловдун пасы Мурзаев үчүн катуу болуп калды. Тилекке каршы, топ аутка кетти. Биринчи тайм дагы соңуна чыгып баратат.

21:16 Статистикага токтоло кетсек: Топко ээлик кылуу 53 пайыз коноктор, башкача айтканда, Кыргыз футболчулары. Ал эми үй ээлери 47 пайыз болууда. Люкстун кезектеги соккусу индус дарбазачысы үчүн оңой жолтоо болуп калды.

21:17 Биринчи тайм соңуна чыгып калган. Бирок алыс 1-таймга 3 мүнөт кошумча кошту.

21:21 Мусабековдун соккусун Индиянын дарбазачысы тосуп кетти. 1-тайм соңуна чыкты, эсеп: 0:0.

21:35 2-тайм старт алды. Кооптуу абал. 20 метр аралыктан айып сокку. Исраилов топто. Жыйынтыгын күтөбүз. Топ коргоочуларга тийип калды. Исраилов бул мүмкүнчүлүктөн пайда алып келе алган жок. Дагы бир мүмкүнчүлүк жокко чыкты.

21:42 Кыргыз футболчулары чабуулун улантууда. Мурзаевдин соккусу таамай болбой калды. Дарбазага узатылган соккулар боюнча упайлардын саны: 13:6 Кыргыздын пайдасына.

21:46 Исраиловдун тепкен соккусу дарбаза мамысына тийип калды. Баалуу мүмкүнчүлүк колдон чыкты. Майердин да кошумча чабуулу майнапсыз болуп калды.

21:47 Кооптуу абал! Үй ээлери кооптуу чабуул уюштурду. Сунил Четри 5 метр аралыктан дарбазадан өйдө тепти.

21:54 Исраиловдун соккусун кайрадан дарбазачы тосуп кетти. Ахлидин Исраилов активдүү оюну менен өзгөчөлөнүүдө. Дарбазага тепкени, кооптуу абалды жаратканы да Исраилов болууда.

21:55 Чабуулдарыбызда жаракат алып калган Антон Землянухин оюн талаасында жетишпей жаткансыйт. Негизинен эсепти ачууга кичине тактык гана жетишпей жатат.

22:59 Эсеп ачылды! Тилекке каршы, биздин пайдабызга эмес, Индия капитаны Сунил Четри таамай болду. Эсеп 1:0.

22:00 Кыргыз курамасында алмашуу: Мурзаевдин ордуна Кайрат Жыргалбек уулу оюнга кошулду. 72-мүнөт аяктады. Эсепти теңөөгө 20 мүнөттөй убакытыбыз бар.

22:02 Ильяз Алимов эреже бузду. Ага башкы калыстан сары кагаз берилди. Азыркы убакытта эрктик, өжөрлүк менен чабуулга өтүү керек.

22:06 Кыргыз тараптан айып сокку. Бернхардттын соккусун дарбазачы оңой эле тосту. Индия футболчулары контр чабуулдарды уюштурууну унутушкан жок. Оюн алдындагы Крестининдин "жеңиш үчүн гана ойнойбуз" дегени атаандашты көзгө илбегендик болгонбу, айтор, учурда жеңиш эмес эсепти теңөө керек. Өз күйөрмандары алдында Индия дагы оңой атаандаш эмес экендигин көрсөтүп жаткан учур.

22:12 Үчүнчү алмашуу: Майердин ордуна Ахмедов кирди. Кооптуу абал! Муролимжон Ахмедов дээрлик ачык дарбазага киргизе албай калды.

22:14 Учурда Кыргыз курамасы үч коргонуу менен ойноого өттү. Туура, эсепти теңөө керек. Стандарттык абал... Индия Коргоочулар мыкты оюн көргөзүүдө.

22:19 Кайрат Жыргалбек уулу 2 атаандашын алдап өткөнү менен, сокку узата албай калды. Индустар убакытты созуу менен алек. Калыс 4 мүнөт кошумча убакыт кошту. Шашып уюшулган чабуулдарда ката да көп болууда.

22:23 Сунил Четри машыгуудагыдай эле эки оюнчуну алдап өтүп, сокку узатты. Топ өйдө кетти. Кыргыздан Люкс сокку узатты. Дарбазачы тогуздуктан чыгарып кетти!

22:25 Бурчтан чыгарып берүүгө дарбазачыбыз Матяш да келди. Акыркы чабуул да майнапсыз. Калыстын ышкырыгы жаңырды. Бул беттешти Индия 1:0 эсеби менен жеңди.

22:30 Муну менен "А" тайпасында Индия 6 упай менен 1-орунга көтөрүлсө, экинчиде Мьянма 3 упай жана Кыргыз өлкөсү 3 упай менен үчүнчү орунда. 4-орундагы Макаодо упай жок.