Митингчилердин жерди трансформациялоо маселеси парламенттин жыйынында карала турган болду

Бүгүн, 15-июнда депутаттар жерди трансформациялоо жөнүндө мыйзам долбоорун жыйындын күн тартибине киргизүүнү сунуштап жатышат. Бул боюнча бүгүн эртең менен күн тартибине киргизүүнү "Өнүгүү-Прогресс" фракциясынан депутат Тазабек Икрамов суранган.

КСДП фракциясынан депутат Кожобек Рыспаев: “Кээ бир маселелер шашылыш каралат. Ал эми элге тиешелүү маселелер ар кандай шылтоо менен каралбай келет. Элди кыйнабай бул маселени тез арада чечип, чекит коюшубуз керек”, - деп айтты.

“Кыргызстан” фракциясынан депутат Дастан Жумабеков, КСДП фракциясынын лидери Иса Өмүркулов, депутат Рыскелди Момбеков бул маселени чечүү керек экенин баса белгилешти.

Рыскелди Момбеков мыйзам долбоорун кароого өкмөт же Жогорку Кеңештин аппараты тоскоол жаратса, аларды жоопко тартуу зарыл экенин айтты.

Жогорку Кеңештин төрагасы Чыныбай Турсунбеков: “Митингге чыккандар үнүңөрдү уксун деп ушул маселени көтөрүп жатасыңар. Добуш берүүгө келгенде башкача сүйлөп каласыңар”, - деген пикирин айтты.

Жыйынтыгында маселени бүгүн саат 14:00дө кароо боюнча добушка коюлуп, 71 депутат “макул” деп добуш берди.

Эске салсак, бүгүн Ак Үйдүн алдына турак жай салынып калган сугат жерлерди трансформациялоо тууралуу мыйзамдын Жогорку Кеңеште каралуусун талап кылган "Трансформация" элдик кыймылынын мүчөлөрү митингге чыгышкан.