Бакыт Жусупов Кыргыз мамлекетинин Венгриядагы элчиси болуп дайындалды

Кыргыздын Австриядагы элчиси, ЕККУдагы жана Венадагы башка эл аралык уюмдардагы туруктуу өкүлү Бакыт Жусуповго кошумча милдеттер жүктөлдү. Ал Кыргыз мамлекетинин Венгриядагы элчиси болуп дайындалды. Тийиштүү жарлыкка 16-июнда Кыргыз Республикасынын Президенти Алмазбек Атамбаев кол койгон. Бул тууралуу президенттин басма сөз кызматы билдирди.

Бакыт Жусупов Чүй облусунун Москва районуна караштуу Чоң-Арык айылында туулган. 2002-жылы Кыргыз Улуттук университетин бүтүргөн.

2002-2005-жылдары КУУда мугалим болуп иштеген. Стратегиялык анализ жана божомолдор институтунда илимий кызматкер болуп 2005-2007-жылдары иштеген. 2007-2008-жылдары дипломатиялык кызматта референт, 2008-2010-жылдары Тышкы иштер министрлигиндеги Чыгыш мамлекеттери департаментинде катчы болуп эмгектенген.

2010-2011-жылдары өкмөттүк аппаратта тышкы саясат боюнча эксперт, 2014-жылга чейин президенттик аппаратта эксперт, 2014-2017-жылдары президенттик аппараттын тышкы саясат бөлүмүнүн башчысынын орун басары болгон.