Патрулдук милиция кызматкеринин айдоочуга орой мамиле жасап, коркутканы боюнча кызматтык иликтөө башталды

Бүгүн, 16-июнда Патрулдук милиция кызматкери менен айдоочунун ортосундагы кайым айтышуу жазылып калган видео интернетке тарады. Видеодо айдоочу телефондун камерасына тартуу үчүн инспектордун жанына барганы көрсөтүлөт. Ошол учурда инспектордун айдоочунун телефонун колунан жулуп алып, чөнтөгүнө салып койгонун көрүүгө болот. Андан соң экөөнүн сүйлөшкөн сөздөрү баары жазылып калган. Андагы сөздөргө караганда орган кызматкери айдоочуга орой мамиле жасап, "керек болсо өлтүрүм коём" дегени угулат.

Окуя боюнча SUPER.KG'ге Чүй облустук Патрулдук милициянын басма сөз катчысы Тилек Исаев кызматкер ким экендиги аныкталгандыгын айтып берди.

"Окуя кечээ, 15-июнь күнү Чүй районунун аймагында Бишкек-Балыкчы жолунда болуптур. Окуяга катышкан милиция кызматкеринин өздүгү такталды, ал Анарбек Үмөтов аталган райондун Патрулдук милициясында иштейт. Учурда бул кызматкердин үстүнөн Чүй ОИИБинин өздүк коопсуздук кызматы кызматтык иликтөө жүргүзүп баштады. Жыйынтыгында ал инспектордун күнөөсү болсо мыйзамда каралган жазасын алат. Жетекчилик уруксат берсе ошол инспектордун төшүндөгү камеранын видеолорун да жакынкы күндөрү жарыялайбыз", - деди Исаев.