Бишкекте "элитка" деп аталган көп кабаттуу үйдө өрт чыгып, бир батир толук күйдү

17-июнга караган түнү Бишкекте Киев көчөсүндө "элитка" деп аталган көп кабаттуу турак жайда өрт чыкты. Бул тууралуу ӨКМнын басма сөз кызматы билдирди.

Маалыматка ылайык, түнкү саат 01:15 чамасында Киев,114/2 дарегинде жайгашкан 11 кабаттуу үйдүн 7-кабатында өрт чыгып, №66-батир толугу менен күйдү. Жалпысынан 100 чарчы метр аянты өрттөндү. Батирдеги 2 эшик, 2 терезе, телефон, диван, сыналгы күйүп кетти. Өрт саат 02:08де курчоого алынып, саат 03:00дө толугу менен өчүрүлдү. Өрттү өчүрүүдө 5-10-кабаттарда болгон 12 адам куткарылды. Кырсыктан улам жаракат алгандар жана каза болгондор жок. Өрттүн себеби иликтенүүдө.