ИИМ: Апта аралыгында 456 кылмыштын бети ачылып, 9 тоннадан ашык баңгизаты кармалды

Кыргыз өлкөсүндө 12-июндан 18-июнга чейин милиция кызматкерлери тарабынан ачылган кылмыш фактыларынын санын Ички иштер министрлигинин маалымат кызматы жарыялады.

Маалыматта айтылгандай, ыкчам изилдөө аракеттеринин натыйжасында 456 кылмыштын бети ачылды. Алардын 95и изи сууй электе ачыкталса, 161и мурда катталган кылмыштар. Мыйзамсыз баңгизатын жүгүртүү боюнча милиция кызматкерлери 9 тонна 543 килограмм 768 грамм маңзатын кармашкан.

"Мындай ири көлөмдөгү баңгизатынын табылып алынышы - Чүйдүн Аламүдүн районуна караштуу Озёрная айылынын тургуну 1 гектар 20 сотых аянтка кара куурай өстүргөндүгүнө байланыштуу болду. Анын бул мыйзамсыз аракеттери ачыкталып, өстүргөн кара куурайдын чийки салмагы 9 тонна 520 килограммды түздү", - дейт ИИМдин маалымат кызматы.