“Өлкөдөгү ири мүйүздүү малдын 92 пайызы идентификациядан өттү” дейт ветеринардык коопсуздук инспекциясынын директору

Өлкөдөгү ири мүйүздүү малдын 92 пайызы идентификациядан өттү. Бул тууралуу бүгүн, 19-июнда парламенттин тийиштүү комитетинин жыйынында ветеринардык жана фитосанитардык коопсуздук боюнча мамлекеттик инспекциянын директору Калыс Жумаканов билдирди.

Ал ири мүйүздүү малды идентификациядан өткөрүү иши 2017-жылдын сентябрь айында толугу менен бүтө турганын маалымдады.

Анын айтымында, 2018-жылы жылкылар, 2019-жылы койлор идентификациядан өтсө, 2020-жылы толугу менен бүтөт. Жумаканов идентификация иши үч жылга кечиктирилип башталганын кошумчалады.

Агрардык саясат, суу ресурстары, экология жана регионалдык өнүктүрүү боюнча комитетинде малды идентификациядан өткөрбөгөн жарандар административдик жоопкерчиликке тартууга багытталган мыйзам долбоору биринчи окууда каралды. Анда мыйзам кабыл алынса 2017-жылдан баштап жарандар жоопкерчиликке тартыла турганы жазылган. “Кыргызстан” фракциясынан депутат Дастан Жумабеков 2020-жылы идентификация толугу менен бүтсө, 2017-жылы жоопкерчиликке тартылат деген жобо туура эмес экенин айтты. Карапайым эл кыйналып кала турганын билдирди. Жыйынтыгында мыйзам долбоор кайра иштеп чыгууга жөнөтүлдү.