Экономика министри: "Өлкөдөн Грузияга төө буурчак, пияз экспорттолот”

Кыргыз өлкөсүнөн Грузияга төө буурчак, пияз экспорттолот. Ал эми Грузиядан Кыргыз мамлекетине минерал суулары, дары-дармектер, электр жылыткычтары импорттолот. Бул тууралуу бүгүн, 20-июнда парламенттин тийиштүү комитетинде экономика министри Арзыбек Кожошев билдирди.

Анын айтымында, Кыргыз Республикасында Грузия менен 80 биргелешкен ишкана бар, бирок азырынча 3 гана ишкана иштейт. 2016-жылы эки өлкөнүн товар жүгүртүүсү 6 миллион 4 миң долларга жеткен.

Жыйында “Кыргыз өкмөтү менен Грузиянын өкмөтүнүн ортосундагы инвестицияларды колдоо жана коргоо жөнүндө макулдашууну ратификациялоо жөнүндө” мыйзам долбоору каралды.

Мыйзам долбоорунун максаты - инвесторлор үчүн жагымдуу шарттарды түзүү жолу менен алардын укуктарын жана кызыкчылыктарын коргоону камсыз кылуу. Ошондой эле чет өлкөлүк инвестицияларды тартуу чөйрөсүндө келишимдик укуктук базаны түзүүгө багытталат.