Жогорку Кеңештин жыйынында 20га жакын эле депутат отурат

Бүгүн, 21-июнда Жогорку Кеңеште түшкү тыныгуудан кийин 20га жакын эле депутаттын катышуусунда жыйын өтүүдө. Ал эми каттоодон 88 депутат өткөн.

Учурда "Кыргыз Республикасынын судьяларынын статусу жөнүндө” Конституциялык мыйзамына өзгөртүүлөрдү киргизүү тууралуу” мыйзам долбоору экинчи окууда каралып жатат.

Жыйынга катышып жаткан депутаттар сот болуу үчүн бир жыл окутуудан өтүүсү керектиги тууралуу талкуулап жатышат.

КСДП фракциясынан депутат Осмонбек Артыкбаев Жогорку Сотко судья болууга бараткандар бир жылдык окуудан өтпөй эле коюусу керек экенин айтты. Ал эми "Республика-Ата Журт" фракциясынан депутат Мирлан Жээнчороев сот адамдын тагдырын чече турганын айтып, судьялар бир жыл окуш керек экенин баса белгиледи.