"Эу, чык эшикке!" деп премьер-министр кууп чыккан чиновник сөгүш алды

Өкмөттүн 20-июндагы кеңешмесинде премьер-министр Сооронбай Жээнбеков суроосуна татыктуу жооп ала албагандыгы үчүн Архитектура, курулуш жана турак жай коммуналдык чарба мамлекеттик агенттигинин жетекчисинин орун басары Алмазбек Абдыкаровду залдан кууп чыккан эле.

Өкмөттүк аппараттан билдиришкендей, чиновник өз кызматын так аткарбагандыгы үчүн бүгүн сөгүш алды. Агенттиктин маалымат кызматынын өкүлү Эсен Ташкараев бүгүн түшкө жакын Алмазбек Абдыкаров өз ордунда кадимкидей эле иште болгонун билдирген.

Сооронбай Жээнбеков жыйын учурунда берген суроолоруна канааттандырарлык жооп ала албай: "Чоң-Алайда жарык, таза суу, жолдор жок, ал жакта эл кантип жашайт?! Эгер мен азыр жумуштан айдап жиберсем, Жээнбеков мени жөн эле айдап жиберди деп айтасың. Бул жерге келерден мурда Ошко чалып, ал жакта эмне болуп жатат, качан даяр болот деп сурап койбойсуңбу? Эмнеге өзүң чалбайсың өзүңдүн структураңа? Чык бар! Эу, чык эшикке!" - деп ачууланып залдан кууп чыккан.

Эске салсак, жаз айларында Оштун Чоң-Алай жана Өзгөн райондорунда жаратылыш кырсыктары катталып, бир нече үйлөр жараксыз абалга келген. Өкмөт кыш айларына чейин жабыр тарткан элдин турак жай маселелерин чечип берүүсү керек.