"Гранд комфортто" ток уруп каза болгон жигит электр тармагын билбесе да электрик болуп жумушка алынган

Бүгүн, 22-июнда түшкү саат 14:30 чамаларында Бишкектин Чолпон-Ата көчөсүндөгү "Гранд комфортто" ток уруп каза болгон жигит жаңыдан гана электрик болуп жумушка орношкондугу, бирок өзү кесиби боюнча электрик эместиги белгилүү болду. Каза болгон баланын жакыны Бактыгүл Жанкөйлиеванын SUPER.KG'ге билдиришинче, баланын кесиби электрик эместигине карабай аны 3-4 күн мурун соода борбордун жетекчилиги жумушка алган.

"Бизге баланын өзүнүн телефонунан чалып "бала ток уруп каза болуп калды" деп 2 саат мурун чакырышты. Келсек бала өзү жерде жатыптыр, аны карап койгон киши болбоптур. Соода борбордун жетекчилери качып кетишти. Кимдир бирөө бул боюнча жооп бериши керек эле, бирок милиция келип каза болгон бала менен чогуу иштеп жаткан кесиптешин гана алып кетти", - деди Жанкөйлиева.

Баланын жансыз денеси учурда өлүк сактоочу жайга алып барылып, андан ары Ысык-Көл районунда жашаган ата-энесине жеткирилет. Каза болгон баланын аты Ноорузбек. Ал болгону 21 жашта жана үйлөнө элек болгон.