Ысык-Көлдөгү жарылуудан жабыр тарткандарга жана каза болгондордун жакындарына акчалай жардам бөлүндү

Ысык-Көл районуна караштуу Ананьево айылында газ саткан жайдагы жарылуудан жабыр тарткандарга жана каза болгондордун жакындарына акчалай жардам көрсөтүлгөндүгүн SUPER.KG порталына райондун акими Данир Иманалиев билдирди.

"Жарылуудан жабыркаган 7 адамга президент тарабынан 20 миң, 1 адамга 10 миң сом акчалай жардам берилди. Ал эми премьер-министр тарабынан ар бир жабырлануучуга 10 миң сомдон, райондук администрациядан 4 миң сомдон каражат бөлүндү. Жарылуудан каза болгон адамдардын жакындарына премьер-министр 50 миң сомдон каражат бөлдү", - дейт Данир Иманалиев.

Жарылуудан жабыркап Чолпон-Ата аймактык ооруканасында дарыланып жаткандардын бири Бишкек шаарындагы ооруканага жөнөтүлгөн. Райондун башчысы калган жабыркагандар да жакынкы аралыкта борбордогу ооруканаларга жөнөтүлөрүн кошумчалады.