Бак кулаган унаада жабыркаган 12 жаштагы өспүрүм кыз эсине келди

23-июнда катталган катуу шамалда Бишкектеги Лев Толстой көчөсүндө бараткан Мерседес-Бенц-спринтер унаасынын үстүнө бак кулап, андан жабыркаган өспүрүм кыз оор абалда ооруканага жеткирилген. Бүгүн, 25-июнда жабыркаган кыздын агасы Адилет Өмүрбеков анын эсине келгендиги тууралуу SUPER.KG порталына маалымдады.

Анын айтымында, карындашы Аделя бак кулаган кезде жүрүп бара жаткан Мерседес-Бенц-спринтер унаасынын ичинде болгон. Бак унаанын үстүнө кулап анын баш мээси чайкалып, моюн, акыреги жабыркаган. Ал эми унааны башкарып бара жаткан айдоочунун колу сынган.

"Карындашым Аделя кечээ бир жолу эсине келип "апа" деп кыйкырган. Бирок кайра эле эсин жоготуп койгон болчу. Бүгүн, Кудайга шүгүр, эсине келди, өз алдынча отуруп калды. Дарыгерлер 2 күн эсине келе албай жаткандыгын катуу коркуп, чочуп калгандыгы менен байланыштырып жатышат", - дейт Өмүрбеков.

Эскерте кетсек, буга чейин Бишкек шаардык №3-ооруканасынын башкы дарыгери Талантбек Өмүрбеков өспүрүм кызды жасалма дем алдыруучу аппарат менен карап жаткандыктарын билдирген.