Өзбекстандык студент кыз Режеп Тайип Эрдогандын жан сакчысын өлтүрдү деп шектелүүдө

Өзбекстандык 25 жаштагы Фарида Байрамова Түркия президентинин күзөт башкармалыгында иштеген 24 жаштагы Рамазан Өзчелектин өлүмүнө шектелип, Стамбулдун Бейликдузу райондук полициясынын террорчулукка каршы бөлүмүндө сурак берүүдө.

Бул тууралуу аталган өлкөнүн маалымат каражаттары жарыялады.

Өзчелектин башына Байрамованын батиринде ок тийген. Ал экөө 9 ай мурда социалдык тармак аркылуу таанышышкан. Байрамованын айтуусунда мобилдик телефондогу “орус рулеткасынын” видеосун биргеликте көрүшүп, оюнду кайталагысы келген Өзчелек тапанча менен өзүн-өзү башка атып алган.

Бирок иликтөө маалында белгилүү болгондой, экөөнүн тең мобилдик телефондорунан “орус рулеткасынын” видеосун эч ким көргөн эмес. "Түрк президентинин жан сакчысына кызматтык курал катары берилген тапанча менен "орус рулеткасын" ойноо мүмкүн эмес болчу”, - дешет тергөөчүлөр.

“Өзбекстандык Фарида Байрамова Стамбулдан 850 чакырым алыстыктагы окуу жайдын фармацевтикалык факультетинде окуган. Ал жайкы каникул маалында өз батирине келген. Стамбулдагы батирди Ташкентте белгилүү болгон дарыгер ата-энеси сатып берген”, - деп айтылат маалыматта.

Эскерте кетсек, президенттин жан сакчысынын өлүмү ушул жылдын 19-июнунда катталган. Фарида Байрамова ошол күнү эле жергиликтүү полицияга адам өлүмүнө шектүү катары алынып келинген.