Ошто ижарага алган Мерседес-Бенц-Гелендваген унаасы менен кырсыкка кабылган бүтүрүүчү 2 күндөн кийин эсине келди

Ош шаарында ижарага алган Мерседес-Бенц-Гелендваген унаасы менен кырсыкка кабылган мектеп бүтүрүүчүлөрүнүн абалы турукташууда. Бул тууралуу бүгүн, 27-июнда Ош облустук ички иштер башкармалыгынын маалымат кызматынын тескөөчүсү Жанна Сатарбаева SUPER.KG порталына билдирди.

Анын айтымында, кырсыктан кийин Ош облустук ооруканасынын жандандыруу бөлүмүнө жаткырылган 1999-жылы туулган бала кечээ түнү эсине келген.

"Учурда балдардын биринин абалы жакшы. Жандандыруу бөлүмүнө жаткырылган бүтүрүүчүнүн абалы турукташууда", - деди Сатарбаева.

Эске салсак, 24-июнь күнү Ош шаарындагы Киров атындагы №4-мектеп-гимназиясынын бүтүрүүчүлөрү аттестат тапшыруу аземинен кийин жол кырсыгына учураган. Анда бүтүрүүчүлөр ижарага алган Мерседес-Бенц-Гелендваген унаасы менен бара жатып, унаа башкаруудан чыгып кеткен.

Учурда бул факты боюнча тийиштүү экспертизалар дайындалып, тергөө-иликтөө иштери жүргүзүлүүдө.