Депутаттар Бишкектеги №3-балдар ооруканасынын атын өзгөртүүнү сунуштоодо

Депутат Альфия Самигуллина Бишкек шаарындагы №3-балдар ооруканасынын аталышын өзгөртүүнү сунуштады. Бул тууралуу депутат 28-июнда парламент жыйынында билдирди. Ал шаарда биринчи, экинчи балдар ооруканасы жок болгондон кийин №3-оорукана деген аталыш туура эместигин айтат. Саламаттыкты сактоо министри Талантбек Батыралиев СССР убагында 5 оорукана болгондуктан ушундай аталып калганын айтты. Министр билдиргендей, оптимизация болгондон кийин №3-балдар ооруканасы эле калган. Ошондон бери аты өзгөрбөгөнүн билдирип, аталышты өзгөртүү маселеси каралышы мүмкүн экенин кошумчалады.

Самигуллина борбор шаардын айрым медициналык мекемелерине караганда аймактардагы ооруканалардын абалы кыйла жакшы экенин билдирди. Бишкек шаарында заманбап оорукананын курулушун колдой турганын белгиледи.