УКМК: "Чек арага жакын жайгашкан аймактарда террордук акт даярдап жатышкандар кармалды"

Чек арага жакын жайгашкан аймактарда террордук акт даярдап жатышкан Кыргыз жарандары кармалды. УКМКнын маалыматына караганда, алар 1983-жылы туулган О.Д., 1989-жылы туулган Р.Н., 1986-жылы туулган К.С. жана 1996-жылы туулган Я.К. экени аныкталган.

"Алар колго жасалган жардыруучу зат жана ок атуучу куралдарды колдонуу менен коомдук-саясий кырдаалды дестабилдештирүү максатында чек арага жанаша аймактарда бир катар террордук акцияларды уюштурууну даярдап жатышкан. Бул факты боюнча "терроризм актысын даярдоо", "террорчулук ишти каржылоо", "мыйзамсыз түрдө куралдуу кошуундарды уюштуруу жана ага катышуу", "ок атуучу куралдарды, ок-дарыларды, жарылуучу заттарды жана жардыргыч түзүлүштөрдү мыйзамсыз алуу, берүү, өткөрүү, сактоо, ташуу же алып жүрүү", "экстремисттик материалдарды сатып алуу, даярдоо, сактоо, жайылтуу, ташуу жана жиберүү, ошондой эле экстремисттик же террористтик уюмдардын символдорун же атрибуттарын атайылап колдонуу" беренелери менен кылмыш иши козголду. Кармалган жарандар УКМКнын тергөө жайына киргизилди", - деп билдиришти Улуттук коопсуздук мамлекеттик комитети.

Бирок УКМКнын басма сөз кызматы террордук акт даярдап жатышкандар качан жана кайсы жерде кармалганын айтышкан жок.