Үпөл Анаркулова Башкы прокуратурага жазган арызында Индира Жолдубаевадан депутатка карата кылмыш ишин козгоону өтүнгөн

Журналист Үпөл Анаркулова КСДП фракциясынан депутат Жылдыз Мусабекованын үстүнөн Башкы прокуратурага арыз жазганын «24.kg» маалыматтык агенттиги жазып чыкты. Маалыматты агенттикке укук коргоо органдарынан тастыкташкан.

Укук коргоо органдарынын маалыматы боюнча, Ү.Анаркулова арызга Мусабекова аны адепсиз сөздөр менен шылдыңдап, коркутканын жазган.

"Ал арызына депутат "спортчуларды жалдап, зордуктатам" деп айткан телефондогу сүйлөшүүсүнүн аудиожазуусун да тиркеген. Анаркулова Башкы прокурор Индира Жолдубаевадан депутатка карата кылмыш ишин козгоону өтүнөт", - деп жазылат маалыматта.

Эске салсак, ушул жылдын 27-апрелинде депутат Жылдыз Мусабекова "туура эмес маалымат жазгансың деп", - журналистти коркуткандыгы маалымдалган. Көп өтпөй журналист экөөнүн телефондогу сүйлөшүүлөрүнүн аудиожазуусун жарыялап, 12-майда бир катар бийлик бутактарына кайрылуу катын жолдогон. Өз учурунда депутат журналистти сөкпөгөндүгүн, аудиожазуу монтаж экенин айткан. Жогорку Кеңештин Конституциялык мыйзамдар, мамлекеттик түзүлүш, сот-укуктук маселелер жана регламент боюнча комитети бул маселени карабай фракцияга жиберген эле. Фракция ушул кезге чейин депутаттын жоругун карай элек. КСДПнын лидери фракция депутаттын бул ишин кароого даяр экенин айтканы менен, Мусабекова ооруп калгандыгын айтып, 5 жолку жыйынга келген жок. Анаркулова фракция бул маселени парламент каникулга тараганга чейин создуктуруп жүрүп, каникулдан кийин унуткарып жиберүү аракетин көрүүдө деген оюн айткан.