Кытайда оорулуу кызын атасы мүрзөдө жатууга көндүрө баштады

Кытай Эл Республикасынын Нэйцзян шаарындагы Сычуань провинциясындагы фермер Жан Линьгдин 2 жаштагы кызы оор илдеттен жабыркайт. Кызын дарылатууга каражат таба албай калган ата ага көрүстөн казып, күн сайын бош убактысын ошол жерде кызы менен өткөрөт. Линьг наристени алдын ала мүрзөгө жатууга көндүрө баштаганын Daily Mail басылмасы Кытайдын ЖМКларына таянып жазууда.

Фермердин кызы талассемия - кандагы гемоглобиндин төмөндүгүнөн жабыркайт. Мындай абал бара-бара адамдын кан айлануусундагы көйгөйлөргө алып келет.

Линьг жубайы экөө наристени дарылатууга 15 миң доллар каражат сарптаган, мындан ары ага каражат табууга кудуреттери жетпей калган. Жакын арада кызымдан түбөлүккө айрылам деген ата тагдырына баш ийип, анын мүрзөсүн алдын ала казган. Социалдык тармактарда кызы менен мүрзөдө чогуу жатып, аны таптап жаткандагы атанын видеосу колдонуучулардын зээнин кейиткен. Алардын жанында кыздын кош бойлуу апасы отурат. Наристе кыздын бейкапар ит менен ойноп жаткандыгы да тартылган. Апасынын колундагы кагазда жана курсагында алардын элден жардам сураган банктык эсеби жазылган.

Бул үй-бүлөнүн аянычтуу тагдырын видеодон көргөндөр фермердин кызынын оорусун айыктырууга каражат жагынан жардам берүүнү каалагандар табылат деген оюн билдирүүдө.