Жалал-Абад облусунда беш миңдей бүтүрүүчүнүн аттестаттары жараксыз болуп калды

Жалал-Абад облусунун аймагындагы район, шаарларда мектепти быйыл аяктаган беш миңдей бүтүрүүчүнүн аттестаттары жараксыз болуп калган. Буга “Тартип” аталышындагы басмакана беш миңдей бүтүрүүчүнүн аттестаттарындагы “Кыргыз Республикасынын” деген жазууда “Н” тамгасын кошпой жазып салышы себеп болгон.

Облустук усулдук билим берүү борборунун директору Акылбек Токтосунов жараксыз болуп калган аттестаттарда техникалык ката кеткенин, учурда анын баары калыбына келтирилип жатканын айтты.

“Жараксыз болгон аттестаттар кайра жыйналып Бишкекке жөнөтүлгөн. Бул жерде “Тартип” аттуу басмакана техникалык катага жол бергендиктен кайрадан калыбына келтирип жатат. Биз бүгүн, 29-июнь күнү кечке чейин аттестаттардын оңдолгон вариантын таратып бүтөбүз”, - деди Акылбек Токтосунов.

Ошондой эле облустук усулдук билим берүү борборунун директору бул абал бүтүрүүчүлөрдүн жогорку окуу жайына тапшыруусуна тоскоол болбой турганын кошумчалады.