Ноокат районунда жаш келинге боорун алмаштыруу үчүн операция жасоого каражат жетишсиз болууда

Ош облусуна караштуу Ноокат районунун тургуну Венера Маматалиеванын боорун алмаштырып, жүрөгүнө операция жасатуу зарыл болууда. Бул тууралуу бүгүн, 1-июлда SUPER.KG порталына бейтаптын күйөөсү Ниязбек Абдрахман уулу билдирди.

"Келинчегим альвеококкоз оорусуна чалдыккан. Учурда боорун алмаштырып, жүрөгүнө операция жасатышы зарыл экен. Анткени оорунун белгилери боор менен жүрөктө жайгашыптыр. Кыргызда мындай оор операцияларды жасоого медициналык аппараттар жок дешти. Ошондуктан тез арада Түркияда операция жасоого камынып жатабыз. Адистердин айтымында, 40-50 миң доллар зарыл экен. Мындай каражатты таба албай убарабыз. Ошон үчүн коомчулукка кайрылууга аргасыз болдук", - дейт Абдрахман уулу.

Венера Маматалиева 27 жашта. Анын эки уулу бар. Улуусу 2,5 жашта болсо, кичүүсү 7 айлык. Үй-бүлө башчысы Ниязбек Абдрахман уулу унаа оңдоочу жайда иштеп, көп акчаны таба албастыгын айтат.

"Пенсия жашындагы ата-энем операция жасатууга салым кошушат. Бирок аларда да анчалык көп каражат жок. Айылдагы малдарды сатып каражат топтоп баштадым. Кайрымдуу адамдар каражат жагынан жардам берсе баш тартпайм", - деп кошумчалады Нияз Абдрахман уулу.