Жаңы паспорттогу "улуту" деген графаны алып салууга каршы Конституциялык палатага арыз берилди

Бүгүн, 3-июлда жаңы паспорттогу "улуту" графасын алып салууга каршы Конституциялык палатага арыз берилди. Бул тууралуу SUPER.KG порталына саясатчы Азимбек Бекназаров билдирди.

Бекназаровдун айтымында, улут тууралуу графаны алып салуу Конституцияга каршы келет.

"96 саясий кыймылынын, уюмдардын макулдугу менен укугубузду коргоо максатында арыз менен кайрылдык. "Улутуңду унутпа" кыймылынын төрагасы Шамшыбек Медетбековго, мүчөсү Жыргалбек Касаболотовго жана "Туруктуу элдик кеңеш" кыймылынын атынан мага ишеним көрсөтүлүп, арызды алып келдик. Кабыл алынды, эми кандай чечим чыга турганын күтөбүз", - деди ал.

Эске салсак, 1-майдан тарта жарандын улуту тууралуу жазуусу жок паспорттор берилүүдө. Ал тууралуу маалымат паспорттун сыртына эмес, ичиндеги чипке жазылары айтылган.