Өткөн кылымдын эң зулум баңги төбөлүнүн Мексикадагы үйү 5 жылдыздуу мейманканага айланды

Дүйнөгө каардуулугу боюнча аты чыккан Колумбиялык баңги төбөл Пабло Эскобардын Мексикадагы үйү 5 жылдыздуу мейманканага айланды. Бул туурасында аталган өлкөнүн маалымат каражаттары жазып чыгышты.

"Пабло 20-кылымдагы кокаин сатуу менен алектенген эң каардуу жана зулум кылмыштуу топтун башчысы катары таанымал болгон. 1993-жылы ал каза болгондон кийин анын 23 бөлмөлүү үйүндө 10 жылдай эч ким жашаган эмес. 2012-жылы гана Лио Малка аттуу ишкер үйдү сатып алып, чакан эко-конок үйүн ачкан. Жакынкы күндөрдөн тарта имаратты кеңейтип, 5 жылдыздуу мейманканага айлантты", - деп жазылат маалыматта.

Баңги төбөлү Эскобардын тагдыры тууралуу жазылган маалыматтарга кайрыла турган болсок, ал 1980-жылдары мыйзамсыз маңзатын соодалагандардын сап башында турган. АКШга күнүгө 15 тонна кокаинди ар кандай айла амалдар менен жеткирип, жылына 22 миллиард доллар киреше тапкан. Мыйзамсыз тапкан кирешесин ачыктай албагандыктан суу өтпөгөн баштыктарга салып, жер төлөлөргө сактаган. Ал келемиш-чычкандардан коркчу, себеби бекиткен акчаларынын 10 пайызын дал ушул майда кемирүүчүлөр жеп кетип турган. Өмүрүнүн аягында үй-бүлөсү менен качкында жүргөндө, отун таппай накталай 2 миллион доллар акчаны күйгүзүп сууктан үшүп калган кызын жылытканы айтылат маалыматтарда.