Орус ЖМКлары: "Дмитрий Песков Путин Кыргыз жарандарынын улуттук күбөлүк менен иштөөсүн колдогонун айтты"

Орусиялык жалпыга маалымдоо каражаттары өлкөнүн президенти Владимир Путин Кыргыз жарандарына улуттук айдоочулук күбөлүк менен жеке ишкерлик менен алектенүү укугун берүү тууралуу Думанын кайрылуусун колдогонун, анын маалымат катчысы Дмитрий Песковго шилтеме берүү менен жазып чыгышты. Маалыматтарга ылайык, Песков орус тили Кыргыз мамлекетинде расмий тил болгондуктан Путин кайрылууну колдоого алганын айткан.

Эскерте кетсек, үстүбүздөгү жылдын 1-июнунан тарта Орусияда чет өлкөнүн айдоочулук күбөлүгү менен иштегендер жумушка чыга албай калышкан. Алардын арасында Кыргыз мамлекетинин жарандары да бар. Орусиянын Мамлекеттик Думасынын депутаттары Кыргыз жарандарына улуттук айдоочулук күбөлүктөрү менен транспорттук каражатты башкаруу менен байланышкан ишмердүүлүктү жүргүзүүгө уруксат берүү тууралуу Орусиянын президентине кайрылуу жөнүндө токтомду бир добуштан кабыл алышкан.