Ананьеводогу жарылуудан жабыр тарткандардын экөөсүнүн абалы өтө оор бойдон калууда

Ысык-Көл облусуна караштуу Ананьево айылындагы газ саткан жайда болгон жарылуудан жабыр тарткан 2 адамдын абалы өтө оор бойдон калууда. Бул тууралуу Саламаттыкты сактоо министрлигинин басма сөз катчысы Жылдыз Айгерчинова билдирди.

"2 адам жандандыруу бөлүмүндө, 3 адам күйүк борборунда дарыланып жатат. Дарыгерлер жандандыруу бөлүмүндөгү 2 адамдын абалын өтө оор, күйүк борборунда дарыланып жаткан 3 адамдын абалын туруктуу, бирок оор деп баа беришүүдө. Негизи күйүп калган адамдар 1-2 жумада эле айыгып калбайт. Дарыгерлер колдорунан келген жардамын берип жатышат", - дейт Жылдыз Айгерчинова.

Эскерте кетсек, буга чейин Ананьеводогу болгон жарылуудан алгач 2 адам каза таап, 8 адам ооруканага түшкөн. Жабырлануучулардын биринин жаракаты жеңил болгондуктан ошол эле күнү ооруканадан үйүнө чыгарылган. Кийин жабырлануучулардын экөө оорукананын жандандыруу бөлүмүндө каза болгон.