Заара толтурулган желим бөтөлкөлөр филармониянын жанындагы өтмөктөн табылды. Аны 3 КамАЗга жүктөп алып кетишти (фото)

Бишкектеги филармониянын жанындагы өтмөктөн заарага толгон 3 КамАЗ желим бөтөлкөлөр чыгарылды. Бул тууралуу SUPER.KG'ге Бишкек мэриясынын маалымат кызматы тастыктады.

"Өтмөктө иштеген соодагерлер желим бөтөлкөлөргө заара ушатып, аны 5 жылдан бери тепкичтин алдына катып жүрүшкөн. Учурда өтмөккө ажаткана куруу пландалып жатат", - дешти мэриядан.

Мэриянын капиталдык курулуш боюнча башкармалыгынын жетекчисинин орун басары Койчугул Ибраимовдун айтымында, бул кылыкты ким жасап жүргөнү аныкталса, өтмөк ишке киргенден кийин ага ижарага орун берилбеши мүмкүн.

"Бул кылыкты бир киши жасады деп деле айтуу кыйын. Бирок өтмөктө ажаткана жок болгондуктан көпчүлүгү бөтөлкөгө заара ушатып, ушул жакка таштап салган болушу мүмкүн. Жалаң эле бөтөлкөлөр эмес, полиэтилен баштыктары да бар экен. Эми анын ичинде эмне бар экенин деле караган жокпуз. Эгерде бул кылыкты ким жасаганы аныкталса, ага ижарага орун бербөө сунушун киргизебиз", - деди Ибраимов.

Ажаткана маселесин шакабага алган Максим Галкиндин тамашасын сунуштайбыз.