Суудай аккан шарап, андагы жылаңач кыздар: Испанияда салтка айланган фестиваль башталды

Испаниянын түндүгүндөгү Наварра автономиялуу облусунун борбору Памплонада жыл сайын өтүүчү Сан-Фермин фестивалы башталды. Бул тууралуу чет элдик маалымат булактарында жазылууда. Сан-Фермин-Наварранын сактоочусу ыйык Ферминдин урматына уюштурулган салтанат деп түшүндүрүшөт жергиликтүүлөр.

Фестивалдын негизги өзгөчөлүгү болуп - адамдардын букалар менен тең жарышуусу же алардан качуусу эсептелинет. Фестивалдын алкагында бүгүн, 6-июлда испаниялыктар жана башка өлкөлөрдөн келген туристтер шаардын борбордук бөлүгүнө топтолуп, бири-бирине вино чачышты. Бул майрамга топтолгондор бири-бирине суу чыгарган тапанча, желим бөтөлкө, кумура, чакалар менен вино чачышат. Майрам 14-июлга чейин созулат. Испаниядагы салтка айланган бул фестиваль 1591-жылдан бери өткөрүлүп, көптөгөн туристтердин кызыгуусун жаратып келет.

Сан-Фермин - бул спорттун экстремалдык түрүн сүйгөндөр үчүн жакканы менен, ага каршы чыккандар да көп. Анткени майрамда шаарга букалардын тобу коё берилип, алар адамдарды аралап чуркашат. Бул учурда адамдар алардан качып же четке чыгып кетет. Бирок оюндан жабыр тарткандар көп кездешет. Майрамдын алкагында вино, таттууларды бири-биринен аяшпайт. Испаниялыктар бул фестивалда өздөрүнө жаккан ар кандай жоруктарды аткарууга уруксат кылышат. Чечинип алып, жылаңач денелерге вино куюу да фестивалда өөн көрүнбөйт.