"Пусть говорят" берүүсүнүн каарманы Диана Шурыгина эфирге катышканы үчүн 300 миң рубль алганы айтылууда

Орустардын “Пусть говорят” телеберүүсүнүн негизги каармандарына канча гонорар төлөнөрүн айрым орусиялык жана украиналык басылмалар иликтеп чыгышкан. Басылмалардын бири аталган телеберүүнүн мурунку кабарчысы Андрей Заокский менен байланышканда, ал каармандарга гонорар төлөнөрүн тастыктаган.

Анын айтымында, телеберүүнүн конокторуна 5 миң рублдан 300 миң рублга чейин төлөнөт. Анын өлчөмү каармандын актуалдуулугунан жана соодага болгон жөндөмүнөн көз каранды. Алгач эфирге катышуу сунушу киргизилген адамга 5 миң рубль сунушталат. Эгер ал адам эфирге чыгууга макулдук бербесе, 50 миңге чейин көтөрүлөт. Ал эми коомчулуктун кызыгуусун арттырган каарманды кайталап чакырууга туура келсе, сөзсүз түрдө ага чоң суммадагы каражат төлөнөт.

Эскерте кетсек, былтыр көрүүчүлөрдүн арасында 17 жаштагы Диана Шурыгинанын бир түндө 2 жолу зордукталганы катуу талкууга алынган. “Пусть говорят” берүүсү аны 5 жолу катары менен эфирге чакырган. Ал үчүн Диана Шурыгинага да гонорар берилгенин айткан Андрей Заокский.

“Дианага 500 миң рубль берилди деген калп. Менин билишимче ал 200 же 300 миң рубль гана алган”, - деген ал.

Ал эми Диана Шурыгина катышкан телеберүүгө барып, аны сындаган кыргыз блоггери Данияр Токтомамбетов менен байланышканыбызда эфирге бекер эле катышканын айтты.

“Мени телеберүүгө чакырышкан, өзүмдүн каалоом менен бекер эле баргам. Телеберүү тарабынан жол кирем менен жаткан жерим, тамак-ашым гана төлөндү”, - деди ал.

Ошондой эле бир канча жылдан бери чуу жараткан берүүлөрдүн каарманы, бир карасаң балдарды жалгыз асыраган атанын образында, бир карасаң бирөөнүн көңүлдөшүнүн ролунда жүргөн орус жараны Василий Васильев үчүн телеберүүлөргө катышып, каражат табуу кесипке айланган. 12ден ашуун берүүнүн каарманы болгон Василий орус теледолбоорлорунун ичинен эң аз төлөгөнү “Пусть говорят” экенин айткан. Ал эми эң көп төлөгөнү “Дом-2” долбоору. Анда катышуучунун жөндөмүнө жараша, 30 миңден 70-80 миңге чейин, ал эми популярдуу катышуучуларга 100-150 миң рублга чейин төлөнөрүн жазышкан басылмалар.