Интернетти бийи менен жарган "жеңе": "Видеону кайын-журтуң көрсө эмне дейт, уят эмеспи деп катуу сындашты"

Бүгүн, 6-июлда "жеңенин" бийи интернетке кенен жайылып, коомчулук арасында жылмаюуну, талкууну жаратты. Колдонуучулар мындай өмүрлүк жар менен жашоо кайсы жерде болбосун кызыктуу өтөрүн айтып жатышты. Жайлоодо бийди катырган студент кыз Сайкал Жумалиева менен SUPER.KG порталы байланышып, видео кандайча тартылып калганын билдик.

"Мен борбордогу окуу жайлардын биринде 3-курста окуйм. Жайкы эс алууда ата-энемдин жанына Ат-Башынын Арпа жайлоосуна баргам. Ал жактан жөн кетпей эсте кала турган видео тартууну ойлоп, апамдын халаты менен жоолугун салынып, үй шыпырып жатып ырдап кирген жеңенин образын аткардым. Кечинде ал видеону социалдык баракчама жүктөп койгом. Эртеӊ менен турсам видеону көргөндөр, билдирүү калтыргандар көп болуп кетиптир", - дейт Жумалиева.

Ошондой эле аны "видеону кайын-журтуң көрсө эмне дейт, уят эмеспи!" деп сындагандар болгонун айтат.

"Көпчүлүк мени келин деп ойлоп, "кайын-журтуң көрсө эмне дейт, уят эмеспи!" деп сындашыптыр. Бирок мен турмушка чыга элегимди айтып актангым келген жок. Ал гана эмес, устуканды микрофон кылганымды да катуу сынга алышты. Видео 2-3 мүнөттө даярдыксыз эле тартылгандыктан колума тийген нерсени микрофон кылууга туура келди".

Ошондой эле эргүү келгенде ар түрдүү видеолорду даярдап турарын кошумчалады.