Кадамжайда кышка камылга кызуу жүрүүдө (фоторепортаж)

Жайдын аптабында Кадамжай районунда чөп чабык кызып жаткан учур. Тургундар себилген беделерди чаап, кыштын камын көрүшүүдө.

Кадамжайдагы Сары-Талаа жайлоосу Пүлгөн айылы жана Халмион айыл аймагынын жашоочуларына үлүш жер катары бөлүнүп берилген. Тургундар арпа буудайдан сырткары бул жакта малга тоют болуучу беде, эспарцетти өстүрүшөт.

Мурун чөп чабыкка чыгарда эл чалгы даярдап, келиндер тамак жасап берүү үчүн барышар эле. Техника өнүккөн заманда чөп оруучу комбайндар ишке кирип, чөп-чабык бир топ жеңилдеген.

Комбайндар оргон чөп кургаган соң атайын тракторлор менен пресстелет. Чөптү кол менен байлагандар да жок эмес.

Жалпысынан Сары-Талаа жайлоосундагы 1 000 гектар аянтка үрөн себилген.

Аба ырайынын бузулушу ишти токтото турганы маалым. Орулган чөптөрдү тез жыйнап албаса, жамгыр жаагандан кийин чөп карарып кетери белгилүү. Учурда күндүн катуу ысыганы дыйкандарга жакшы шарт түзүп берип жатат.

Чөптү орулган жеринде түктөп сатып алгандар дагы бар. Баасы 100 сомдон болот.

Даяр болгон чөптү жыйнап, жашоочулар жүк ташуучу унааларга жыйып алып кетишет.