Ленин райондук сотунда сабалган конвой милицияга арыз жазды

Ленин райондук сотунда сабалган конвой милицияга арыз жазды. Бул тууралуу бүгүн, 8-июлда SUPER.KG порталына Жазаларды аткаруу мамлекеттик кызматынан билдиришти.

"Сабалган конвойдун денеси көк-ала болуп, ал Ленин РИИБине арыз менен кайрылган. Соттук-медициналык экспертиза жүрүүдө. Эми конвойго кол көтөргөндөр боюнча милиция иликтөө иштерин жүргүзөт", - деп билдиришти Жазаларды аткаруу мамлекеттик кызматынан.

Буга чейин 6-июль күнү Бишкек шаарынын Ленин райондук сотунда эки мектеп окуучусун сүзгөн айдоочунун иши боюнча биринчи соттук отурум өткөн. Анда кылмышка шектүү Мирлан Ажибековду конвой алып кетип бара жаткан учурда эки окуучунун жакындары ага кол көтөрүшүп, сабоого аракет кылышкан. Бирок аларды конвой токтотуп калган эле. Ошол учурда айрымдар конвойго да кол көтөргөнгө жетишкен.

Айта кетсек, жол кырсыгы үстүбүздөгү жылдын 21-апрель күнү Бакаев менен Ремесленная көчөлөрүнүн кесилишинде катталган. Анда катуу ылдамдыкта келе жаткан унаа эки мектеп окуучусун сүзүп, айдоочу кырсык болгон жерден качып кеткен. Ошол эле күнү шектүү катары 1988-жылы туулган Мирлан Ажибеков аттуу айдоочу кармалып, убактылуу кармоочу жайга киргизилген болчу..