15 жылдан бери алгачкы жолу тазаланып жаткан Бишкектин көлдөрүнө азырынча түшпөй туруу сунушталууда

Бишкек шаардык мэрия шаар тургундарынан борбордогу Пионер жана Комсомол көлдөрүнүн тазалоо иштери бүтмөйүн жана аларга суу толтурулмайын түшпөй турууну өтүндү.

"Тазалоо иштери бүткөн соң мамлекеттик санитардык-эпидемиологиялык көзөмөл тарабынан Кара-Жыгач токоюндагы көлдөрдүн суусу текшерилет. Анын жыйынтыгынан сууга түшүү сезону качан ачылары белгилүү болот. Анализдер чыккан соң гана шаардыктар кооптонбой көлдөргө түшө алышат", - деп жазылат маалыматта.

Аталган көлдөр 15 жыл аралыгында алгачкы жолу "Жашылдандыруу" ишканасы тарабынан тазаланып жатат. Тундурманын жалпы аянты 0,7 гектар. Көлдөрдүн түбүнүн аянты 6 гектар, Пионердин аянты 4 гектар болсо, Комсомолдуку 2 гектар.

"Жалпысынан тазаланчу аянт 21 миң метр куб болсо, бүгүнкү күндө 16,7 миң метр куб аянты тазаланды. Көлдөргө сууга түшүү июль айынын ортосунан тарта уруксат берилери болжолдонууда", - деп кошумчалашкан мэриядан.