Чехияда унаада бара жаткан кыздар түз эфир маалында жол кырсыгына кабылды

Чехиялык эки кыз унаада социалдык тармактардын биринде түз эфир аркылуу өздөрүн видеодон чагылдырып бара жатып, жол кырсыгына кабылды. Бул тууралуу аталган өлкөнүн маалымат каражаттары 10-июлда жарыялады.

"Видеодо кыздардын бирөөсү унааны жогорку ылдамдыкта башкарып баратканы, жанындагы жүргүнчү кыз телефон аркылуу түз эфирде тааныштары менен сүйлөшүп бараткан көңүлдүү маанайлары тартылган. Бир аз убакыттан соң айдоочу рулду башкара албай калып, алардын жол кырсыгына кабылганын байкоого болот", - деп айтылат маалыматта.

Ошондой эле окуя боюнча унаа саатына 120 чакырым ылдамдыкта келип, жолдун четиндеги тосмо дубалды сүзгөнү, жүргүнчү кыз ошол жерден каза болуп, айдоочу ооруканага жеткирилгендиги белгилүү болду.

Эскерте кетсек, өткөн жумада да Украиналык эки кыз унаада баратып түз эфир маалында жол кырсыгынан каза болушкан эле.