Уулун Москванын СИЗОсунан чыгара албай жаткан кыргыз эне: "Уулумду Өзбекстандын чек ара кызматы издөөгө бериптир"

Орусиянын Москва шаарында иштеген Апиза Бактораева бүгүн, 11-июлда SUPER.KG порталына 1996-жылы туулган уулу Талантбек Дехконовду 2 айдан ашык убакыттан бери Москва шаарындагы убактылуу кармоочу жайдан чыгара албай жатканын билдирди.

Анын айтымында, үстүбүздөгү жылдын 5-майында уулу Кыргыз өлкөсүнөн Орусияга учуп барган. Учактан түшөр замат издөөдө болгону үчүн чек арачылар тарабынан кармалган.

"Мен өзүм Кара-Жантак айылынан болом. 2 жыл мурун уулум ошол айылдан Кадамжайга келе жатканда өзбек чек арачылары кармап алышып, "соттойбуз" деп уруп-согушуптур. Балам качып кутулган. Андан бери Кыргызда аскер кызматын өтөгөн, Кыргыз жараны. Өзбекстан баламды "чек араны бузган" деген айып тагып, издөөгө бериптир. Орусиялык чек арачылар Өзбекстанга Талантбек кармалганы тууралуу маалымдашыптыр. Эми алардан жооп келсе, Өзбекстанга кетиришерин айтып жатышат. Менин уулум Кыргыз жараны, элчиликке барсам, жыйынтык чыкпай жатат", - дейт Апиза Бактораева.

Апиза Бактораева уулун Өзбекстанга кетирбөө үчүн болгон аракетин кылып жатканын айтып, бирок бири да ишке ашпаганын кошумчалады.