Ошко Өзбекстандын колдоосу менен 630 окуучуга ылайыкталган мектеп курулат
Ош шаарына Өзбекстандын колдоосу менен салына турган мектептин курулуш иштерине даярдыктар жүрүп жатат. Бул тууралуу бүгүн, 11-июлда аталган шаардын мэриясынын басма сөз кызматы билдирди.
Мэр Айтмамат Кадырбаев 10-июлда мектеп курула турган жерге барып, Өзбекстандын “Трест-12” компаниясынын өкүлдөрү менен жолукту.
“Мэрия шаардын борборунан 1 гектардан ашык жерди мектеп курууга бөлүп берди. Долбоорго ылайык, курулуштун жалпы аянты 3851 квадрат метрди түзөт. Бул мектептин курулушу келечекте эки элдин достугунун бекемделишине өбөлгө болот”, - деди мэр.
Долбоор боюнча, жаңы мектепте спорт зал жана жыйындар залы, кол эмгек сабагы өтүлүүчү бөлмө, медициналык пункт, ашкана, жайкы спорттук комплекс салынат. 630 окуучуга ылайыкталган мектеп 3 кабат болуп курулат.
Эске салсак, 19-июнда Жогорку Кеңештин тармактык комитетинде бул маселе каралган. Анда аталган мектепте билим берүү кыргыз тилинде жүргүзүлөрү айтылган.




















1 |