Позитивдүү бийчи "жеңеге" жооп катары бийлеген жигит: "Эми чогуу бийлегиле деген сунуштар айтылып жатат"

Өткөн аптада интернет колдонуучулары боз үйдөн шыпыргы кармап бийлеген позитивдүү "жеңенин" бийине күбө болушту эле. Көп өтпөй бийчи кызга жооп катары жайлоодо кымыз ичип бийлеген жигиттин видеосу социалдык тармактарга жүктөлдү. Аны көрүүчүлөр дароо эле "күйөө бала" деп атап алышты.

"Күйөө баланын" бийи Алайдын жайлоолорунда тартылган. Адегенде эле боз үйдүн ичинде кымыз ичкен жигит эшикке чыгып Майкл Жексондун ырына катыра бийлеп баштайт. Курут жеп, эшекти минип кеткени "күйөө баланын" бийинин өзгөчөлүгү болгон.

Бийчи жигиттин аты Нурсултан Алибеков, 26 жашта. Бишкек шаарында туулган. Көпчүлүктүн көңүлүн бурган видеосу тууралуу ал SUPER.KG порталына төмөнкүлөрдү айтып берди.

"Алайга эс алууга бара жатканда Сайкал Жумалиеванын видеосун көрүп калдым. Ал мага ошол видеонун эркектерге байланыштуу вариантын тартуума түрткү болду. Алайга барганда байкелеримдин кийимдерин кийип, бетиме көө сүйкөп тарттык. Ар кандай идеялардан кийин курутту жеген көрүнүштү, эшек мингенди коштук. Сайкал белгилүү ырга бийлегенден улам мен дагы Майкл Жексондун ырын тандадым. Баары эле эми биргеликте видео тартсаңар деген сунушун айтып жатышат. Алдыда бир чоң долбоор бар. Ошону ишке ашыруу үстүндө иштеп жатабыз. Жакынкы күндөрү тартуу кылабыз", - деди ал.

Алибеков буга чейин Азат Райымбердиевдин "Воспоминание", Темир Назаровдун "Знаю я", Чолпонай менен Асконун "Чыгыш жомогу", Дайыр Исмадияровдун "Бактымды таптым" өңдүү бир катар клиптерге тартылган. Мындан сырткары "ЖинМэн" комедиясында роль жараткан.