"ЭЛДИК КАБАРга" жооп: "Жарандардын кат жүзүндө арызы жок болсо, биз курулушту текшере албайбыз" дейт адистер

Бишкек шаарынын Балбан-Таймаш жаңы конушунун жашоочусу SUPER.KG порталына WhatsApp аркылуу алар жашап жаткан турак үйлөрдүн жанына май куюучу жай курулуп жатканын билдирген.

Анда окурман Профсоюзная көчөсүндө турак үйлөрдүн жанына май куюучу жайды жергиликтүү тургундардын каршылыгына карабай куруп жатышканын айткан.

Бишкек шаарынын экотехинспекциясынын аймактар боюнча башкармалыгынын башчысы Мелис Адиев тургундардан арыз түшмөйүнчө, курулушка барып текшере албай турганын билдирди:

"Эгерде мыйзамсыз куруу иштери жүрүп жатса, жабырлануучу тарап биринчи Экотехинспекцияга арыз менен кайрылышы керек. Арызы жок биз эч жакка чыга албайбыз. Ал эми жогорудагы май куюучу жай тууралуу бизге арыз келип түшкөн эмес. Андыктан биз бул маселе боюнча аракет көрө албайбыз. Арыз менен кайрылса, ал ишти текшерүүгө алабыз".

Белгилей кетсек, май куюучу жай турак үйлөрдөн 50 метр алыстыкта курулушу керек.