Түркиянын оппозициялык дин аалымы Фетхуллах Гүлен Түркияга баруудан качпай турганын билдирди

Түркиянын оппозициялык дин аалымы Фетхуллах Гүлен Америка Кошмо Штаттары аны өз өлкөсүнө кайтарып берүү тууралуу буйрук чыгарса, ал качууга аракет кылбай, Түркияга кайтарын билдирди. Белгилей кетсек, буга чейин Гүлен АКШдан Канадага кетери тууралуу сөз тараган, ал бул маалыматты төгүндөп, "Рейтер" агенттигине "эгер Вашингтон мени тапшырууну туура көрсө, мен Түркияга кете берем" деп билдирген.

Мындан тышкары маегинде ал учурдагы Түркиянын президенти Режеп Тайип Эрдогандын саясатын дагы сындап, "диктаторлук" режим менен өлкөдөгү жалпыга маалымдоо каражаттарына басым жасап жатканын айтып өттү. Ошондой эле ал АКШнын президентинин жетекчилиги менен Дональд Трамптан жана Европа өлкөлөрүнүн бийликтеринен Түркиядагы саясий эркиндикти калыбына келтирүүгө көмөк көрсөтүүнү суранган.

Маалыматка ылайык, Түркиянын вице-премьери Нуман Куртулмуш Гүлендин Канадада анын сатып алган жери жана кыймылсыз мүлкү бар экенин айтып, ошол жакка качып кетерин билдирген.

Белгилей кетсек, Түркиянын бийлиги Фетхуллах Гүленди 2016-жылдын 15-16-июлдарындагы өлкөдөгү баш аламандыкты уюштурууга катыштыгы бар дешип, аны АКШдан кайтарууну суранышкан.