Баткен райондук суу чарба башкармалыгына "сууну үнөмсүз пайдаланган" деп 18 миң сом айып салынды

Баткен райондук суу чарба башкармалыгына сууну үнөмсүз пайдалангандыгы үчүн айып салынды. Мындай маалыматты бүгүн, 13-июлда Экологиялык жана техникалык коопсуздук боюнча инспекциянын басма сөз кызматынан билдиришти.

"Баткен суу чарба башкармалыгын текшерүүгө алынды. Ишкананын карамагындагы магистралдык каналдарынан аккан суулар кароосуз калгандыгы аныкталган. Тагыраак айтканда, сууну агымын, өлчөмүн көзөмөлдөгөн адис тарабынан иш жүргүзүлгөн эмес. Натыйжада сууну жергиликтүүлөр өз билемдик менен үйлөрүнө түтүкчөлөр, ар кандай жабдыктар аркылуу колдонуп келишкен. Жеринде инспекторлор тарабынан акты, протоколдор толтурулуп, тиешелүү иш жүргүзбөгөндүгү үчүн Баткен суу чарбасынын жетекчиси Эрматовго 18 000 сом айып салынды", - деп билдирди басма сөз кызматы.

Маалыматка ылайык, башкармалыкка кемчиликтерди жоюу үчүн бир айлык мөөнөт берилген. Ал эми жеринде аныкталган айрым кемчиликтер инспекторлордун көрсөтмөсү менен жеринде жокко чыгарылды.