Чотоновдун адвокаттары сотту алмаштырууну өтүнүшүп, бирок өтүнүч канааттандырылган жок

Айыпталуучу Дүйшөнкул Чотоновдун жактоочулары сот Айбек Эрнис уулуна ишенбестик көрсөтүү боюнча өтүнүч келтирди. Бүгүнкү соттук процессте ушундай эле өтүнүчтү Текебаевдин жактоочусу Искен Афиджанов да келтирип, сот канааттандырган эмес. Сот жактоочунун өтүнүчү боюнча тараптардын пикирин сурады. Текебаев: "Мен колдойм. Сиз күбө Маевский, Абдрахманов, Модинди ойлоп, "ушундай болсо керек" деген көрсөтмөлөрүн үлгү катары көрсөтүп жатасыз. Ошол эле учурда экс-президент Роза Отунбаева баштаган бир топ биздин күбөлөрдүн көрсөтмөлөрүн түрдүү суроолор менен бөлүп жатасыз. Ушундан улам мен сизди ушул нерсеге кызыкдар деп билем жана жактоочунун өтүнүчүн колдойм", - деди.

Айыпталуучу Чотонов да сотко ишенбестик билдирди. "Мен ушул сотту карап отуруп мындан ары бул сот адилет болоруна ишенбей калдым. Ошондуктан жактоочуларым сизге ишенбөөчүлүк көрсөтүп жатат. Мен өтүнүчтү колдойм", - деди Чотонов.

Кеӊешүүчү бөлмөгө кирип чыккан сот Айбек Эрнис уулу өтүнүчтү канааттандырган жок.