"Чыгып кет, жогол!" деп кыйкырган Кара-Суу райондук ЖААКтын кызматкери иштен кетүү боюнча арыз жазганы маалым болду

"Чыгып кет, жогол!" деп кыйкырган аял түшүнүк кат жазып берди. Ошону менен бирге иштен кетүү боюнча да арыз жазган. Мындай маалыматты бүгүн, 17-июлда SUPER.KG порталына Кара-Суу райондук жарандык актыларды каттоо бөлүмүнүн директорунун милдетин аткаруучу Гүлзина Абдраимова билдирди.

"Документ алууга келген адамга кыйкырып, орой сүйлөгөн кызматкер бизде иштейт. Бул видео 2016-жылы тартылыптыр. Мында документке келип кызматкер менен урушкан адам өзү сөгүнүп, катуу сүйлөптүр. Мындан улам пикир келишпестик жаралган. Видео коомчулукка тарагандан кийин кызматкер Айжан Мурзабекова түшүнүк катын жазып берди. Эми арызын жазып иштен кетем деп жатат. Анын дарегине айтылган ачуу сындарга чыдабай ыйлап жүрөт. "Балдарым, үй-бүлөм сөгүнгөн, жаман жазылган сындарды окуса эмне деген ойдо калат" деп сар-санаа болууда. Анын жолдошу прокуратурада иштечү. Азыр иштебейт", - деп билдирди Абдраимова.

Эске салсак, буга чейин кызматкердин орой сүйлөп, кыйкырган видеосу жарыяланган.