Кыргыз жарандары Казакстандын аймагында 30 күнгө чейин каттоосуз жүрө алышат

Ушул жылдын 15-июлунда Кыргыз Республикасынын өкмөтүнүн жана Казакстан Республикасынын өкмөтүнүн ортосундагы протокол күчүнө кирди. Бул тууралуу Тышкы иштер министрлигинин маалымат кызматы кабарлады.

Ага ылайык, 15-июлдан тартып Кыргыз жарандары Казакстандын аймагында 30 календарлык күнгө чейин милдеттүү каттоосуз жүрө алышат. Мурда мындай каттоо мөөнөтү 5 күн болчу.

Убактылуу жүрүү мөөнөтү, жарандын Кыргыз өлкөсүнөн Казакстанга барган күнүнөн баштап, миграциялык картасы же болбосо Казакстандын аймагына кирип жатканда чек ара көзөмөлү койгон белги боюнча эсептелинет.

"Кыргыз жараны Казакстандын аймагында 30 календарлык күндөн ашык жүргөн учурунда Казакстандын ИИМинде (барган жери боюнча каттоого туруу) каттоого туруусу зарыл. Кыргыз жарандары Казакстандын мамлекеттик чек арасынан өткөн учурдан тартып 90 календарлык күндөн ашпаган мөөнөткө катталат жана ушунча мөөнөткө узартылышы мүмкүн", - деп жазылат маалыматта.

Ушундай эле эрежелер Кыргыз мамлекетине кыска мөөнөткө келүүгө ниеттенген Казакстандын жарандарына карата да колдонулат.